ەلباسىنىڭ تاپسىرماسىمەن «Nur Otan» پارتياسى جانىنان قۇرىلعان بالالاردىڭ قۇقىقتارىن قورعاۋ جونىندەگى كەڭەس مۇشەلەرى «باقىتتى وتباسى» جوباسى اياسىندا قىزىلجار وڭىرىندە جۇمىسساپارمەن بولدى.
وبلىستىق اكىمدىكتە وتكەن كەڭەستە ءسوز العان بالالاردىڭ قۇقىعىن قورعاۋ رەسپۋبليكالىق كەڭەستىڭ وكىلى رىستى جۇمابەكوۆا كەڭەستىڭ باستى مىندەتى بالالاردىڭ زاڭدى قۇقىقتارى مەن مۇددەلەرىن قورعاۋ بولىپ تابىلاتىنىن اتاپ كورسەتتى.
ايماق باسشىسىنىڭ ورىنباسارى رۋسلان الىشەۆ جەرگىلىكتى جەرلەردە بالالارعا جاسالىپ جاتقان قامقورلىقتار جايلى باياندادى. جىل باسىنان بەرى 4826 از قامتىلعان وتباسىعا كومەك كورسەتىلگەن. ينكليۋزيۆتى نەگىزدە ءبىلىم الاتىن 2042 وقۋشىعا بارلىق مۇمكىندىكتەر تۋدىرىلعان. مۇمكىندىگى شەكتەۋلى بالالار ءۇشىن رەسۋرستىق ورتالىق, پسيحولوگيالىق وڭالتۋ كابينەتى جۇمىس ىستەيدى.
«جەتى ايدىڭ ىشىندە ءبىر جاسقا دەيىن بالاسى بار 3424 اناعا 351 ميلليون تەڭگە مولشەرىندە جاردەماقى تولەندى. از قامتىلعان وتباسىلاردى ماتەريالدىق قولداۋ رەتىندە 35 ميلليون تەڭگە جۇمسالدى. قوسالقى شارۋاشىلىقتى دامىتۋ ءۇشىن 81 كوپبالالى وتباسى دەمەۋقارجىعا يە بولدى», دەدى جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسى باسشىسىنىڭ ورىنباسارى گۇلميرا ماۋلەتباەۆا.
الايدا, بۇل سالادا كەمشىلىكتەر دە جوق ەمەس. جىل باسىنانا بەرى 4 بالانىڭ دەنساۋلىعىنا زاقىم كەلگەن. 18 بالا زاڭ تالاپتارىن بۇزسا, 11-ءى ۇرلىق-قارلىقپەن اينالىسقان. جىنىستىق قاتىناسقا ءتۇسۋدىڭ 14, جاس بالانى ازعىرۋدىڭ 1, زورلاۋدىڭ 2 فاكتىسى اشكەرەلەنگەن.
جيىندا بالا دەنساۋلىعىن مەكتەپتە قاداعالاۋ وزەكتى ماسەلەلەردىڭ ءبىرى ەكەنى ايتىلدى. وقۋشىلار اراسىندا سكاليوز, مايتابان, تىرەك-قيمىل اپپاراتىنىڭ كەسەلدەرى كوبەيىپ بارادى.
ساراپتامالىق توپ مۇشەلەرى ەكىكۇندىك ساپار بارىسىندا وبلىس ورتالىعىمەن قاتار 5 اۋداندا بولىپ, 60-قا جۋىق نىساندى ارالاماق.
سولتۇستىك قازاقستان وبلىسى